Mosyon ni VP Sara, Diringgin ng QC RTC

Nagtakda ang isang hukuman sa Quezon City ng oral arguments sa Agosto 20 kaugnay ng mga kasong grave threats laban kay Bise Presidente (B.P.) Sara Duterte, upang talakayin ang mosyon ng kaniyang legal team na ibasura ang kaso at pigilan ang paglabas ng warrant of arrest.

Ayon sa dalawang pahinang kautusan na may petsang Agosto 17 mula sa Quezon City Regional Trial Court (R.T.C.) Branch 98, tatalakayin sa naturang pagdinig ang urgent omnibus motion ng bise presidente na ipawalang-bisa ang criminal information at ipagpaliban o bawiin ang pagpapalabas ng arrest warrant.

Ang kasong nakatala bilang People of the Philippines v. Sara Duterte y Zimmerman (Case Nos. R-QZN-26-06956 hanggang 06958-CR) ay kinabibilangan ng tatlong count ng grave threats sa ilalim ng Republic Act No. 10175 o ang Cybercrime Prevention Act of 2012.

Nangangahulugan na pormal na inihain ng Department of Justice (D.O.J.) ang kasong kriminal na People of the Philippines v. Sara Duterte y Zimmerman (Case Nos. R-QZN-26-06956 hanggang 06958-CR) sa Quezon City R.T.C. Branch 98 batay sa nakikitang prima facie evidence sa ginawang imbestigasyon ng National Bureau of Investigation (N.B.I.). 

Ang paggamit ng pamagat na People of the Philippines ay nagpapakita na ang estado at lipunan ang itinuturing na napinsala sa isang kriminal na paglabag. 

Nag-ugat ang tatlong count ng grave threats (Article 282 ng Revised Penal Code) sa pampublikong pahayag ng bise presidente noong Nobyembre kung saan binanggit niya ang umano’y pagkuha ng papatay kina Pangulong Ferdinand Marcos Jr., First Lady Liza Araneta-Marcos, at dating Speaker Martin Romualdez sakaling siya ay mapatay. 

Dahil ginawa ang mga pahayag sa pamamagitan ng online press conference, inihain ang mga ito kaugnay ng Section 6 ng Republic Act No. 10175 o Cybercrime Prevention Act of 2012, na nagpapataw ng mas mataas na antas ng parusa para sa mga krimeng ginawa gamit ang teknolohiya.

Naghain ng manifestation ang kampo ni B.P. Duterte noong Agosto 14 upang hilingin ang pagsasagawa ng oral arguments para sa kanilang mosyon noong Agosto 11. 

Isinaad ng kaniyang mga abogado na ang pagsasampa ng kasong kriminal laban sa isang nakaupong bise presidente ay nagdudulot ng matinding epekto sa legal at pulitikal na kalagayan ng bansa.

Inihayag din ng legal team ang mga probisyon ng 1987 Philippine Constitution tungkol sa mga impeachable officials, partikular ang Section 3, Article VII, at Section 2, Article XI. Binigyang-diin nila na ang bise presidente ay may parehong kwalipikasyon at termino tulad ng pangulo, at maaari lamang matanggal sa pwesto sa pamamagitan ng impeachment.

Naisumite na ng mga pampublikong tagapag-usig (state prosecutors) ang kanilang pormal na pagtutol o komento laban sa omnibus motion ng bise presidente bago ang nakatakdang pagdinig sa umaga ng Agosto 20.